рубрикалар
рубрикалар
Ўз
English
Русский
O'zbekcha
Дунё
|
15 Сентябр 11:52
“Толибон” етакчилари ўртасида низо чиққан бўлиши мумкин
“Толибон” етакчилари ўртасида низо чиққан бўлиши мумкин. Бу ҳақда “BBC” хабар берди.

 

“Толибон” етакчилари ўртасида низо чиққан бўлиши мумкин

 

Ҳаракатнинг юқори мартабали амалдорларидан бири Мулла Бародар ва Халил Раҳмон Ҳаққоний ўртасида келишмовчилик бошланганини BBC'га маълум қилган. Бародар бош вазирнинг биринчи ўринбосари бўлса, Ҳаққоний миграция масалалари бўйича вазир ҳисобланади.

 

Хабарда айтилишича, икки амалдор бир-бирига кескин сўзлар айтган. Тўқнашувда тарафкашлик ҳолати ҳам рўй берган бўлиши мумкин.

 

Низога Мулла Бародарнинг янги ҳукумат тузилишидан норозилиги сабаб бўлган. Аммо BBC келишмовчиликнинг туб илдизи толиблар ғалабасига ким асосий ҳисса қўшганлиги масаласига бориб тақалишини тахмин қилмоқда. Хусусан, Бародарнинг фикрича, “Толибон”нинг ҳокимиятга келишида сиёсий қанот ва у ўтказган музокаралар катта роль ўйнаган. Халил Ҳаққоний ва унинг ортида турган “Ҳаққоний тизими” гуруҳи эса ғалабага ҳарбий муваффақиятлар сабаб бўлган, деб ҳисобламоқда.

 

Мулла Бародарнинг толиблар ҳарбий қаноти билан низоси ҳақидаги хабарлар бир неча кундан буён тинмаяпти. Унинг ўзи бир ҳафтадан бери кўриниш бермаган. Баъзи манбалар Бародар Кобулни тарк этиб, Қандаҳорга жўнаб кетганини маълум қилди. Унинг қаерда экани ҳақида “Толибон”нинг ўзи ҳам бир-бирига зид баёнотлар бермоқда. Масалан, дастлаб уни Қандаҳорга кетганлиги айтилган. Аммо кейинчалик “Мулла Бародар чарчаган ва унга дам олиш зарур”лиги хабар қилинди.  Шу билан бирга бош вазир биринчи ўринбосари тез орада Кобулга қайтиши ва расмий баёнот бериши ҳам мумкин.

 

Эслатиб ўтамиз, бундан аввал “Толибон” ҳокимиятга келганидан кейин Афғонистонда 100 дан ортиқ ОАВ ёпилгани хабар қилинган эди.

 

 

Жаҳонгир Қўзиев