Андижон вилояти Қўрғонтепа тумани ҳокимлиги янги йил байрами муносабати билан ҳокимият биносини чироқлар билан безатгани жамоат фаоллари томонидан кўплаб танқидларга сабаб бўлмоқда.

“Дастуримизни Андижон вилояти янгиликлари билан давом эттирамиз. Бу янгилик, эможиларга қараганда, одамларга ёқяпти. Маълумот учун, Тошкентдаги президент трассасига илинган шундай безакли чироқлар энергия инқирози бошланганидан бери ўчиқ”, — деб ёзади Муҳрим Аъзамхўжаев ўзининг шахсий Телеграм каналида.

 

Жумладан, «САФАР» Телеграм каналининг муаллифи ушбу ҳолатга ўз фикрини билдирган:

 

“Кўп эҳтимол туманнинг аксарият хонадонларида айни вақтда свет йўқ. Ҳокимлик эса қимматбаҳо ва кўп энергия «ейдиган» чироқлар билан безатилмоқда. Қойил қолмай иложи йўқ бу “каллали раҳбарлар”га. Инсоф берсин сизларга”, — дея ёзади у.

 

Шунингдек, ”Қитмир мухбир“ Телеграм каналининг асосчиси ҳам мазкур хабарлар юзасидан ўз фикрларини билдирган:

 

”Чекка-чекка ҳудудлардаги аҳоли электр токисиз ўтирган пайтда ҳокимлик биносида электр токи борлигини, тўғрироғи кўплигини кўз-кўз қиляптими шунда?", — деб ёзган у ўз каналида.

 

Қўрғонтепа туман ҳокимлиги матбуот хизмати мазкур хабарлар юзасидан расмий муносабат билдирди.

 

Қайд этилишича, ушбу декоратив чироқлар яқинлашиб келаётган янги йил байрами муносабати билан аҳолининг байрамона кайфиятда бўлишини мақсад қилган ҳолда ўрнатилган.

 

“Ҳокимлик биносидаги чироқларни ўрнатиш олдидан мутахассислар энергия тежамкорлиги масаласига эътибор қаратган. Электр сарфи жиҳатидан мазкур декорация 250 ватт қувват сарфлайди ва бу оддий хонадондаги битта чироқнинг сарфидан камроқ. Шу тақдирда ҳам бу чироқлар соат 18:00 дан — 21:00 гача ёниб туриши режалаштирилган бўлиб, аҳолининг оилавий сайр вақтига мўлжалланган. Бошқа вақтларда декоратив чироқларни ёқиш режалаштирилмаган”, — дейилади ҳокимлик муносабатида.