Тошкентда 10 млрд сўмлик «тендер»да иккита қариндош «рақобатлашган»лиги аниқланди

 

Ижтимоий тармоқларда кўплаб муҳокамаларга сабаб бўлган «Ҳокимнинг яширин қарори ва бир-бирига бегона бўлмаган пудратчилар ҳақида» номли хабарда келтирилган ҳолатлар Коррупцияга қарши курашиш агнетлиги томонидан ўрганилди.

 

Аниқланишича, Президентнинг 2023 йил 9 февраль куни «Тошкент шаҳрининг ижтимоий-иқтисодий вазифаларини жадал суръатларда ҳал этиш ҳамда аҳоли фаровонлигини яхшилашга доир қўшимча чора-тадбирлар тўғрисида»ги қарорига асосан Тошкент шаҳрининг ҳар бир маҳалласига маҳалла инфратузилмасини яхшилаш учун 1 миллиард сўмдан маблағ ажратилган.

 

Натижада ушбу қарорга асосан Олмазор туманида жойлашган 64 та маҳалланинг инфратузилмасини яхшилаш бўйича режалаштирилган 64 миллиард сўмлик ишларни бажариш юзасидан пудратчилар ички танлов асосида танлаб олинган. Ўрганишда буюртмачи томонидан 10,1 миллиард сўмлик 2 та танловни ўтказиш жараёнида «Давлат харидлари тўғрисида»ги қонуннинг 42-моддаси талаблари қўпол равишда бузилганлиги аниқланди.

 

Жумладан, туман ободонлаштириш бошқармасининг харид комиссияси томонидан 2023 йил 17 апрель куни ўтказилган танловларда ўзаро рақобатлашган «S.Q», «O.H.G.», «N.A.» ҳамда «A.P.T» МЧЖларнинг раҳбар ва таъсисчилари яқин қариндошлар бўлиб, ўзаро аффилланган шахслар эканлиги маълум бўлди.

 

Бироқ, харид комиссияси томонидан аффилланган шахслар харид қилиш жараёнидан четлатилмасдан «Давлат харидлари тўғрисида»ги қонуннинг 10, 14, 23, 42-моддалари ва «Рақобат тўғрисида»ги қонуннинг 14-моддаси талаблари бузилганлиги аниқланди. Шу ва бошқа қонунбузилиш ҳолатлари юзасидан тўпланган ҳужжатлар ҳуқуқий баҳо бериш учун 25 май куни ҳуқуқни муҳофаза қилувчи органга юборилди.