Тошкентнинг Чилонзор туманида 27 ёшли йигит пул сабабли кар-соқов қизни калтаклагани ҳақида хабар берилган эди. Пойтахт ИИББ матбуот хизмати ушбу йигит терговдан қочиб яширингани учун 22 август куни қидирувга берганди. 25 август куни у қўлга олингани маълум қилинди.

 

«Маълум қиламизки, жиноят содир этгани учун қидирув эълон қилинган Ўткиржон Холматов қўлга олинди. Унга нисбатан тергов ҳаракатлари давом этмоқда. Уни аниқлашда кўмаклашган фуқароларимизга миннатдорчилик билдирамиз», — дейилади пойтахт ИИББ хабарда.

 

Ҳолат юзасидан Чилонзор тумани ИИО ФМБ Тергов бўлими томонидан йигитга нисбатан Жиноят кодексининг 277-моддаси (безорилик) аломатлари билан жиноят иши қўзғатилган. Қиздаги бадан шикастлари оғирлиги даражасини аниқлаш мақсадида суд-тиббий экспертизаси тайинланган.

 

Эслатиб ўтамиз, 20 август куни соат 08:00 да Чилонзор тумани «Шарқ» маҳалласи ҳудудида имконияти чекланган 22 ёшли қиз ва 27 ёшли йигит ўртасида жанжал келиб чиққанди. Ижтимоий тармоқларда ҳолат акс этган видео ҳам тарқалди. Унда йигит қизни ураётганини кўриш мумкин.