Тошкентда ноқонуний қум қазиб олаётганлар ушланди
Текширувда табиатга 100 млрд зарар етказилгани аниқланди.
Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси томонидан Бекобод тумани “Фарҳод” МФЙ ҳудудида навбатдаги экологик назорат тадбири ўтказилди.
Тадбир давомида фуқаролар томонидан ноқонуний равишда қум қазиб олинаётганлиги аниқланди.
Ҳолат юзасидан ўрганиш олиб борилганда, табиатга 100 миллиард 627 миллион 800 минг сўм миқдорида зарар етказилганлиги маълум бўлди. Ҳолатга ҳуқуқий баҳо бериш учун тўпланган барча ҳужжатлар ҳуқуқни муҳофаза қилиш органларига юборилди.
Маълумот учун, аввалроқ Самарқандда айнан ноқонуний қум-шағал қазиш билан боғлиқ иккита ҳолатда табиатга 800 миллиард сўмдан ортиқ зарар етказилганди.
