Туркманистон ҳукумати истеъфога чиқди
Сардор Бердимуҳаммедов инаугурациясида яна қандай масалалар кўтарилди?
Сардор Бердимуҳаммедов Тукманистоннинг нейтрал ташқи сиёсий курсини сақлаб қолишини маълум қилди. Бу ҳақда у инаугурация маросимида айтган.
“Биз дунёдаги барча давлат ва халқларга очиқмиз ҳамда улар билан савдо-иқтисодий, маданий-гуманитар ва илмий алоқаларни ривожлантиришни мақсад қилганмиз”, деган у.
Шунингдек, Туркманистон президенти ўз фаолиятидаги энг муҳим йўналишлардан бирини маълум қилган. Бердимуҳаммедов Туркманистоннинг нефть-газ секторини ривожлантирмоқчи ва унинг халқаро энергетика тизимига интеграция қилмоқчи. Бундан ташқари, логистика салоҳиятини юксалтириш зарурлиги таъкидланди. Бердимуҳаммедовнинг фикрича, Туркманистон “Буюк ипак йўлинининг юраги сифатида географик ва бошқа устунликлар эвазига” минтақавий ва қитъанинг йирик савдо маршрутлари бирлашган нуқтага айланиши мумкин.
Бундан ташқари, Бердимуҳаммедов ҳукуматни истеъфога чиқарди. Шу билан бирга, вазирлар янги ҳукумат шакллангунга қадар ўз вазифасини бажаришда давом этади.
Аввалроқ Сардор Бердимуҳаммедов расман Туркманистон президенти лавозимига киришгани тўғрисида хабар берилганди.
