Украина низоси якунлари бўйича учта вариант тахмин қилинди

 

АҚШ собиқ давлат котиби Генри Киссинжер Украина низоси якуни бўйича 3 вариантни келтирди. Бу ҳақда у The Spectator журналига берган интервьюсида айтган.

 

Дипломатнинг фикрича, биринчи ҳолатда Москва ҳозирги позицияларида тўхтайди. Натижада Украина 20 фоиз ҳудудини йўқотади ва Донбасснинг катта қисми, асосий саноат ҳамда қишлоқ хўжалик минтақаси, шунингдек, Қора денгиз қирғоғининг бир қисми Россия назоратига ўтади.  Киссинжер бу РФ ғалабаси бўлишини таъкидлаган. НАТО ҳам ушбу вазиятда низога тортилмайди.

 

Иккинчи вариант — Россияни эгаллаб олинган ҳудудлардан сиқиб чиқишга уриниш. Аммо низо чўзилиб бориши билан Ғарб ҳам унга қўшилиши хавфи бор.

 

“Учинчи вариант — 24 февралдаги вазиятга қайтиш. Бу ҳолатда Украина қайта қуролланади ва НАТО билан қаттиқ боғланади, у ҳатто альянс аъзосига айланиши мумкин. Бу можаронинг маълум муддатга музлатилишига олиб келади”, — деган собиқ давлат котиби.

 

Маълумот ўрнида: Генри Киссинжер 1969-1975 йилларда АҚШ президентининг миллий хавфсизлик бўйича маслаҳатчиси, 1973-77 йилларда эса давлат котиби бўлган. Уни “АҚШ дипломатияси оқсоқоли” деб аташади. Дипломат, шунингдек, халқаро муносабатлар соҳасида дунёнинг энг етакчи экспертларидан бири.

 

Аввалроқ Владимир Зеленский Россиянинг Украина билан чегараланиб қолмаслигини маълум қилганди.