Дунё тажрибасидан яхши маълумки, сайловларнинг шаффоф, адолатли ва холисона ўтказилиши, аввало, демократик қадриятларнинг устуворлиги, оммавий ахборот воситаларининг эркин фаолияти билан бевосита боғлиқ.
Шу мақсадда Ўзбекистон Электрон оммавий ахборот воситалари миллий ассоциацияси ташаббуси билан Халқаро медиа холл ташкил этилди. Кеча, 14 октябрь куни мазкур медиа-холлнинг очилиш маросими бўлиб ўтди.
Унда Олий Мажлиси Сенати раисининг биринчи ўринбосари Содиқ Сафоев, Олий Мажлис Қонунчилик палатаси спикери биринчи ўринбосари Акмал Саидов, Марказий Сайлов комиссияси раиси Зайниддин Низомходжаев, ЎзЭОАВМА бошқаруви раиси Фирдавс Абдухолиқов, “Юксалиш” Умуммиллий ҳаракати раҳбари Бобур Бекмуродов, Ўзбекистон Ёшлар Иттифоқи марказий кенгаши раиси ўринбосари Шерзод Олимов иштирок этди.
Зайниддин Низомходжаев мазкур медиа-холлнинг очилиши – сайлов жараёнларини янада очиқ ва шаффоф бўлишида муҳим аҳамиятга эгалигини таъкидлади. Шунингдек, МСК раиси Халқаро медиа холл орқали ёшларнинг сиёсий фаоллиги оширишига ишонч билдирди.
Олий Мажлис Қонунчилик палатаси спикери биринчи ўринбосари Акмал Саидовнинг фикрича, Медиа-холл янги Ўзбекистон саройи, кошонаси ҳисобланади. “Менинг таклифим — Халқаро медиа-холлнинг доимий фаолиятини йўлга қўйиш зарур”, — деди Саидов.
Шунингдек, тадбир давомида Республикадаги ёш сайловчилар ҳақида маълумот берилди. Ўзбекистон Ёшлар Иттифоқи марказий кенгаши раиси ўринбосари Шерзод Олимовнинг маълум қилишича, бу йил 880 минг нафар ёшлар илк бор сайловда иштирок этади.
Халқаро медиа-холл тадбирларида 5 000 нафардан ортиқ иқтидорли, фаол ёшлар, ижодкор талабалар, ёш мутахассислар иштирок этиши кутилмоқда. Шунингдек, Халқаро медиа-холл кун тартибидан концертлар, фильм тақдимотлари, қатор маданий дастурлар ҳам ўрин олган.
У 2021 йил 26 октябрга қадар фаолият олиб боради.