Хитой қачон коронавирус чекловларини бекор қилади?
Йирик молия институти таҳлилчилари бу бўйича тахминларини эълон қилди.
Хитой ҳукумати апрелгача аксарият коронавирус чекловларидан воз кечиши мумкин. Бу ҳақда Goldman Sachs Group таҳлилчилари тахмин қилди.
Пекинни бу қадамни амалга оширишга мамлакатда бошланган оммавий норозилик намойишлари мажбур қилиши мумкин. Goldman Sachs иқтисодчиси Хуэй Шань 2023 йилнинг иккинчи чорагида чекловлардан воз кечиш эҳтимолини 30 фоизга баҳолаган.
“Ҳукумат тез орада чекловларни кенгайтириш ва COVID билан касалланишнинг авж олиши каби мураккаб танлов ўртасида қолади”, – деган у.
Commerzbank AG таҳлилчилари ҳам намойишлар ХХР ҳукуматига босим бўлаётганини қайд этишган. Шу билан бирга Hang Seng Bank компаниясининг Хитой бўйича бош мутахассиси Дэн Ван чекловларнинг тез орада бекор қилиниши эҳтимоли пастлигини таъкидлаган. Унинг фикрича, бундай ҳолатда COVID-19 билан боғлиқ ўлим ҳолатлари кескин ошади.
Ноябрда Хитойда коронавирус билан касалланиш яна авж олди. Пандемияга қарши кураш доирасида маҳаллий даражада локдаунлар ва мажбурий ПЦР-тестлар топшириш жорий этилмоқда. Ўтган ҳафта қатор йирик шаҳарлар, жумладан, Шанхай, Гуанчжоу ва Урумчида чекловларга қарши оммавий намойишлар бўлиб ўтди.
