Хитойликлар энди учтагача фарзанд кўриши мумкин
Хитойда бир оилада уч фарзанд кўришга рухсат берилади. Бу ҳақда “Синьхуа” агентлиги хабар берди.
Бутун Хитой халқ вакиллари мажлиси 20 август куни “Аҳоли ва туғилишни режалаштириш тўғрисида”ги қонунга ўзгартириш киритди. Унга кўра, энди хитойликлар учтагача фарзанд кўриши мумкин.
Давлат аҳоли орасида эрта турмуш қуриш ва фарзанд кўришга доир тарғибот олиб боради. Бундан ташқари ҳукумат ёш оилаларга турли молиявий, солиқ, суғурта ва таълим имтиёзлари тақдим этади. Ота-оналарнинг фарзанд дунёга келтириши ва вояга етказиши учун қиладиган харажатларини қисқартишга ёрдам берилади. Шунингдек, давлат ёш боласи бор ходимларга енгиллик ва имтиёз берган ташкилот ва корхоналарни қўллаб-қувватлашини маълум қилган.
2021 йил май ойида Хитой коммунистик партияси оилаларга учтагача фарзанд кўришга рухсат беришни қўзда тутувчи қарор қабул қилган.
Хитойда 70 йиллардан бошлаб оилаларда бирдан ортиқ фарзанд кўришга жиддий чекловлар қўйилган. Лекин бу кейинчалик аҳолининг тез қаришига олиб келди. Шу сабабли 2008-2009 йиллардан бошлаб бир оилада иккитагача фарзанд кўришга рухсат берилган эди.
Жаҳонгир Қўзиев
