Зеленский Путинни "гаплашиб олиш"га чақирди
Украина раҳбарига кўра, учрашув қаерда ва қандай форматда бўлиб ўтиши муҳим эмас.
Украина президенти Владимир Зеленский Россия президенти Владимир Путинни яна бир бор учрашишга таклиф қилди. Бу ҳақда у Мюнхен хавфсизлик конференциясидаги чиқиши чоғида айтиб ўтди.
"Россия Федерацияси президенти нимани хоҳлаётганини билмайман, шунинг учун мен учрашишни таклиф қиламан", деди Зеленский.
Шунингдек, у Украина урушни тўхтатиш бўйича барча мумкин бўлган форматларда ва барча мумкин бўлган платформаларда музокаралар олиб боришга тайёрлигини айтди.
"Париж, Берлин, Минск, Истанбул, Женева, Брюссель, Нью-Йорк ёки Пекин - мен учун дунёнинг қаерида Украинада тинчлик музокаралари олиб борилиши муҳим эмас. Бу тўртта давлат иштирокидами, еттита ёки юзтами фарқи йўқ, асосийси, улар орасида Украина ҳам, Россия ҳам бўлиши керак. Умид қиламанки, ҳеч ким Украинани Ғарб ва Россия Федерацияси ўртасидаги қулай ва "абадий" буфер деб ҳисобламайди. Бу содир бўлмайди, ҳеч ким бунга йўл қўймайди. Акс ҳолда, савол туғилади - навбатдаги ким? ”, деди Зеленский.
Эслатиб ўтамиз, аввалроқ Зеленский Буюк Британия бош вазири Борис Жонсон билан учрашган эди.
