Navoiyda aka-uka tovlamachilikda ayblandi
Navoiyda aka-uka tovlamachilik qilib, Janubiy Koreyaga yuborish uchun ikki do‘stidan 3 000 dollardan pul undirdi. Bu haqda Zamon.uz muxbiri xabar berdi.
1991 yilda tug‘ilgan nurotalik yigit o‘z ukasi bilan Janubiy Koreya davlatiga ishlashga bormoqchi bo‘lib, poytaxtdan ketishiga ko‘maklashuvchi turli tanishlar orttirgan. Ammo ularning hech qanday foydasi tegmagan.
Shundan so‘ng ular o‘z ishining xatoligini bila turib, firibgarlikka qo‘l urgan. Oqibatda 2 nafar sinfdoshining xuddi o‘zi kabi Janubiy Koreyaga ishga ketmoqchi bo‘lganini bilgach, tanishlari orqali ishni tezlashtirib berishini vaʼda qilgan. Jabrlanuvchilarning har biridan 3000 AQSH dollaridan pullarni olib, jami 6 000 AQSH dollarini o‘z ehtiyoji uchun ishlatib yuborgan.
Jabrlanuvchilarning shikoyatlariga ko‘ra, Nurota tumani IIB huzuridagi tergov guruhi tomonidan Jinoyat kodeksi 168 moddasining tegishli bandlariga binoan jinoyat ishi qo‘zg‘atilgan.
