Boris Jonson: “Tolibon”ni qonuniy harakat sifatida tan olinishiga yo‘l qo‘yib bo‘lmaydi”

 

 

Jonson “Tolibon”ning konuniyligini bir tomonlama tan olish nojoiz qadamligini aytib o‘tdi.

 

“Biz alohida davlatlar va “Tolibon” o‘rtasida rasmiy munosabatlar o‘rnatilishini xohlamaymiz” ,- degan Britaniya bosh vaziri.

 

Shuningdek, Jonson bu masalada BMT va NATO birgalikda harakat qilishi lozimligini aytib, Afg‘onistonda hokimiyat almashgani hamda mamlakat siyosiy kelajagi mavhum qolayotganini taʼkidladi. Buyuk Britaniya Bosh vaziri “Hech kim Afg‘onistonning terror o‘chog‘i bo‘lishini yoki yana 2001 yilgacha bo‘lgan vaziyatga qaytishini istamaydi”, - deb aytib o‘tgan.

 

Buyuk Britaniya mudofaa vaziri Ben Uolles ham vaziyatga munosabat bildirar ekan, eng avvalo Britaniya Afg‘onistonga boshqa qaytmasligini taʼkidladi. Shuningdek, mutasaddining fikricha, hozirgi vaziyatda qo‘shni mamlakatlarga afg‘onistonlik migrantlar oqimi yana-da oshishi mumkin.

 

15 avgust kuni “Tolibon” harakati Kobulni egalladi. Shundan keyin shahardagi barcha muhim nuqtalar, jumladan, Prezident saroyi ham  harakat nazoratiga o‘tdi. Afg‘oniston prezidenti Ashraf G‘ani mamlakatni tark etdi.

 

Prezident saroyida o‘tgan muzokaralar natijasida Afg‘onistonda hokimiyat koordinatsion kengash qo‘liga o‘tib, unga Afg‘oniston sobiq prezidenti Hamid Karzay, Milliy yarashuv kengashi boshlig‘i Abdulla Abdulla aʼzo bo‘lib kirgan.

 

So‘nggi maʼlumotlarga ko‘ra, Afg‘onistondagi siyosiy hokimiyat “Tolibon” ning Dohadagi Siyosiy ofisi rahbari Mulla Abdulg‘ani Barodarga o‘tishi kutilmoqda.

 

 

Jahongir Qo‘ziyev