Oʼzbekiston “Tolibon” bilan kelishuv asosida 150 qochqinni Аfgʼonistonga qaytardi
Oʼzbekiston “Tolibon” rahbariyati vakillari bilan oʼzbek-afgʼon chegarasini noqonuniy kesib oʼtgan Аfgʼoniston fuqarolariga nisbatan har qanday zoʼravonlik, tazyiq va taʼqiblarning oldini olish boʼyicha kelishuvlar natijasida 150 nafar qochqinni oʼz xohishi bilan vataniga qaytardi. Bu haqda Tashqi ishlar vazirligi Matbuot xizmati xabar berdi
Qayd etilishicha, “Tolibon” harakati vakillari bilan shu keskin kunlarda oʼzbek-afgʼon chegarasini noqonuniy kesib oʼtgan Аfgʼoniston fuqarolarining xavfsizlik kafolatlarini olish boʼyicha koʼp ishlar qilingan.
Аfgʼonistonga qaytgan fuqarolardan olingan maʼlumotlarga koʼra, ularga nisbatan rasmiy protsessual choralar koʼrilgandan soʼng, ularning hammasi uylariga qoʼyib yuborilgan va hozirda ular oʼz oilalari bagʼrida toʼliq xavfsiz holda boʼlib turibdi.
Qayd etish kerakki, Oʼzbekiston nafaqat afgʼonistonlik qochqinlarni oʼz vataniga qaytarish boʼyicha ishlar olib bormoqda, balki xorijiy fuqarolarni Аfgʼonistondan evakuatsiya qilish boʼyicha Yevropa davlatlariga koʼmaklashmoqda. Bu uchun albatta, minnatdorlik bildirgan davlat rahbarlari ham boʼldi.
Eslatib oʼtamiz, oʼtgan bir necha kun mobaynida Oʼzbekiston hududi orqali xorijiy davlatlarning 1982 fuqarosi evakuatsiya qilindi. Ushbu jarayonlarda Toshkent-3 mahalliy aeroporti tranzit vazifasini oʼtamoqda.
