O‘zbekistonda sunʼiy intellekt texnologiyalarini qo‘llash bo‘yicha maxsus rejim joriy qilinadi
«Sunʼiy intellekt texnologiyalarini qo‘llash bo‘yicha maxsus rejimni joriy qilish chora-tadbirlari to‘g‘risida»gi Prezident qarori qabul qilindi, deb xabar beradi O‘zA.
Qarorga ko‘ra, eksperimental innovatsion tadqiqotlar doirasida sunʼiy intellekt texnologiyalarini qo‘llash bo‘yicha maxsus rejim joriy qilinadi.
Maxsus rejim dasturiy mahsulotlar va axborot texnologiyalari texnologik parkining (IT-park) alohida bo‘g‘ini bo‘lib, uning ishtirokchilari IT-park rezidentlari hisoblanadi va ular o‘z faoliyatini eksterritoriallik prinsipi asosida amalga oshiradi.
Hujjatga binoan, maxsus rejim talabgorlari uchun tajriba-sinov loyihalari doirasida faoliyatga ruxsat etish xususiyatiga ega tegishli hujjatlarni tezlashtirilgan va soddalashtirilgan holda olish tizimi joriy qilinadi. Bunda:
-
Arizalar 5 ish kuni ichida tezlashtirilgan tartibda ko‘rib chiqiladi.
-
Ruxsat etish xususiyatiga ega tegishli hujjatlarni olish uchun talab etiladigan hujjatlar ro‘yxati vakolatli davlat organi tomonidan qisqartiriladi.
-
Tegishli hujjatlarni olish uchun belgilangan to‘lov miqdorlari 2 baravarga kamaytiriladi.
-
Vakolatli davlat organi tegishli faoliyatni amalga oshirishning kamaytirilgan talablari va shartlarini belgilaydi.
Maxsus rejim ishtirokchilariga tajriba-sinov loyihalarini amalga oshirish doirasida IT-park rezidentlariga berilgan imtiyozlar va preferensiyalar tatbiq etiladi.
O‘z xodimlari malakasini oshirish va qayta tayyorlashga ketgan xarajatlari tegishli tartibda davlat tomonidan kompensatsiya qilinadi. Maxsus rejim faoliyatining muddati 5 yilni tashkil etadi. Tajriba-sinov loyihalari 1 yildan ko‘p bo‘lmagan muddatda amalga oshiriladi.
Belgilanishicha, maxsus rejim ishtirokchilari loyihalar tajriba-sinovdan muvaffaqiyatli o‘tkazilgandan so‘ng ularni to‘liq amaliyotga joriy qilishga ruxsat olishi mumkin. Shuningdek, mahsulotni realizatsiya qilishda va xizmatlarni ko‘rsatishda buyurtmachilarni tajriba-sinovdan o‘tkazilayotgani to‘g‘risida ogohlantiradi va ularning tegishli ro‘yxatini yuritadi. Shu bilan birga, ishtirokchilar tezlashtirilgan va soddalashtirilgan tartibda olingan ruxsat etish xususiyatiga ega tegishli hujjatlarda belgilab berilgan talablar va majburiyatlarga to‘liq rioya qilishi shart.
Eslatib o‘tamiz, avvalroq sunʼiy intellektni rivojlantirish ilmiy-tadqiqot instituti tashkil etilgani to‘g‘risida xabar berilgandi.
