Savob umidida sharʼiy nikoh o‘qigan chala mulla 15 sutkaga qamaldi
Bugungi kunda FHDYO tomonidan berilgan hujjatga ega bo‘lmagan shaxslarga sharʼiy nikoh o‘qigan har qanday mulla yoki imom-xatib jinoiy javobgarlikka tortilishi haqida qatʼiy ogohlantirilganiga qarаmay nikohni savob yoki bir oz mablag‘ umidida o‘qib qo‘yayotganlar uchramoqda.
Sud yoki FHDYO organlari tomonidan ajrim to‘g‘risida qaror qabul qilinmasdan turib, boshqa bir ayol bilan noqonuniy ravishda sharʼiy nikoh o‘qilayotgani oilalar buzilishi, ajrimlar soni oshishiga sabab bo‘lmoqda
Jinoyat ishlari bo‘yicha Qashqadaryo viloyati sudi tomonidan imom-xatiblar, mahalla raislari va huquqni muhofaza qiluvchi organlar vakillari ishtirokida sayyor sud o‘tkazildi.
Sudda sartaroshxonada sharʼiy nikohdan o‘tib xotinlikka daʼvo qilgan E.A, xotin ustiga xotin olgan, ayni paytda 4 ayolga uylangan “eri” K.U. ga nisbatan qonuniy jazo so‘radi. K.U. o‘ziga nisbatan bildirilgan daʼvolarning hech birini rad etmadi.
Surishtiruv jarayonida maʼlum bo‘lishicha, sartaroshxonada nikoh o‘qigan K.K ning hech qanday diniy maʼlumoti bo‘lmagan. U bu ishni savob umidida qilgan. Lekin bu unga qimmatga tushdi.
Jinoyat ishlari bo‘yicha Qashqadaryo viloyati Qamashi tuman sudi soxta mullaga 15 sutka qamoq jazosi tayinladi.
Avvalroq, Qamashida noqonuniy sharʼiy nikoh o‘qigan ayol va uch erkak jazolangani haqida xabar bergan edik.
