“Surxon” klubida sodir bo‘lgan voqealarga O‘FA bayonot berdi
Ijtimoiy tarmoqlarda “Surxon” futbol klubining maʼmuriy boshqaruv ofisiga sobiq futbolchilar Javohir Esonqulov va Akrom Xodjayev kelgani, klub ofisida jamoaning ayrim xodimlari va sobiq futbolchilar o‘rtasida nizoli vaziyat vujudga kelgan bilan bog‘liq maʼlumotlar tarqaldi.
Ushbu vaziyat bo‘yicha kecha O‘zbekiston futbol assotsiatsiyasi rahbariyati va masʼul mutaxassislari ishtirokida yig‘ilish bo‘lib o‘tdi.
Unda O‘zbekiston futbol assotsiatsiyasi bu kabi salbiy holatlarni keskin qoralashi va mazkur shaxslarning masʼuliyatsizligi va etika normalariga rioya qilmasligi o‘zbek futboliga putur yetkazishi aytildi.
Ayni paytda ushbu holat bo‘yicha huquqni muhofaza qiluvchi organlar tomonidan tergovga qadar tekshiruv ishlari olib borilmoqda. Shuningdek, holat yuzasidan sud tibbiy ekspertizasi ham tayinlangan.
O‘FA “Surxon” futbol klubi bosh direktori Azamat Abdurahmonov, sport direktori Abdumajid Toirov, futbolchilar Asror G‘ofurov, Javohir Esonqulov va Akrom Xodjayevni futbol bilan bog‘liq har qanday faoliyatdan chetlashtirganini maʼlum qildi.
Jamshidbek Amirov
