Germaniyada mijoz 20 yoshli yoqilg‘i quyish shoxobchasi kassirini niqob taqishni talab qilgani uchun otib o‘ldirdi
Germaniyaning Reynland-Pfalts federal shtatining Idar-Obershteyn shahrida shoxobchaga kelgan mijoz 20 yoshli yoqilg‘i quyish shoxobchasi kassirini niqob taqishni talab qilgani uchun otib o‘ldirdi. Bu haqda “DW” mahalliy politsiyaga tayanib xabar berdi.
Tafsilotlarga ko‘ra, 49 yoshli erkak yoqilg‘i quyish shoxobchasiga kelgan. Kassir jamoat joylarida niqob taqish talabini eslatib, unga xizmat ko‘rsatishdan bosh tortdi.
Shundan so‘ng mijoz uyiga borib to‘pponchasini olgan va yonilg‘i quyish shoxobchasiga qaytgan. Bu gal u tibbiy niqobda borib, kassa oldida atay niqobini yechadi. Kassir unga yana tanbeh berganida, mijoz yigitni otib tashlagan. Prokuraturaning xabar berishicha, mijoz "qurbonning boshiga qasddan o‘q uzgan".
Mijoz keyin jinoyat sodir bo‘lgan joydan qochib ketadi va ertasi kuni ertalab xotini hamrohligida politsiya bo‘limiga kelib, qilgan ishini tan oladi. Tergov paytida u karantin cheklovlariga qarshi ekani, pandemiya tufayli psixologik tazyiqqa uchragani va norozilik bildirishning "boshqa yo‘lini topolmaganini" tushuntirgan.
Erkak hozirda hibsga olingan.
Nasiba To‘xtayeva
