Tezlikni oshirganlik uchun jarima miqdori kamaytirilishi mumkin
O‘zXDP fraksiyasi yig‘ilishida “O‘zbekiston Respublikasining Maʼmuriy javobgarlik to‘g‘risidagi kodeksiga o‘zgartish va qo‘shimchalar kiritish haqida”gi qonuni loyihasi birinchi o‘qishda muhokama qilindi.
Ushbu qonun loyihasida fuqarolarning eʼtirozlariga sabab bo‘layotgan ayrim huquqbuzarliklar uchun jarimalar miqdori pasaytirilgani aytilmoqda.
O‘zXDP fraksiyasining bir guruh deputatlaridan iborat Ishchi guruhi tomonidan avtotransport vositalarini boshqarishda yo‘llarda belgilangan tezlikka rioya etilishini radarlar, shuningdek, statsionar va ko‘chma maxsus texnika vositalaridan foydalangan holda nazorat qilinishi o‘rganilganida fuqarolarimiz tomonidan qo‘llanilayotgan jarimalar yuqori ekanligi bo‘yicha haqli eʼtirozlar bildirilgan.
Shundan kelib chiqib, Maʼmuriy javobgarlik to‘g‘risidagi kodeksining 1283-moddasi ikkinchi qismi sanksiyasidagi jarima miqdorini bazaviy hisoblash miqdorining uch baravari (hozirda 5 baravar) qilib belgilash bo‘yicha taklif bildirilgan.
Shuningdek, jarimalar aholining real daromadlaridan kelib chiqib belgilanishi bo‘yicha yana bir qator takliflar berib o‘tilgan.
Eslatib o‘tamiz, avvalroq ayrim huquqbuzarliklar bo‘yicha jarimalar miqdori kamaytirilayotgani hamda 1 oktyabrdan tonirovka narxi arzonlashishi haqida xabar berilgandi.
Bahriniso Madumarova
