Yangi O‘zbekiston zamonaviy tashqi siyosatining xalqaro-huquqiy asoslari — Hindiston matbuoti nigohida
Hindistonda chop etiladigan haftalik siyosiy-tahliliy nashrlaridan biri - “Political Events” jurnali sahifasida “Yangi O‘zbekiston zamonaviy tashqi siyosatining xalqaro-huquqiy asoslari mustahkamlanmoqda” sarlavhali maqola bosilib chiqdi. Bu haqda “Dunyo” AA xabar bermoqda.
Qayd etilishicha, O‘zbekiston Tashqi ishlar vazirligi Shartnoma-huquq boshqarmasi boshlig‘i Komil Rashidov qalamiga mansub ushbu maqolaga mazkur jurnalning bosh muharriri Muhammad Ismail Xon so‘zboshi yozgan.
Maqola O‘zbekistonning ko‘plab davlatlar bilan ikki tomonlama xalqaro shartnomalari, shuningdek, BMT va boshqa xalqaro tashkilotlarning universal konvensiyalari ratifikatsiyalari Oliy Majlis va Prezident qarorlari asosida hayotga tadbiq etilayotgani haqidagi maʼlumotlar bilan boshlangan.
Unda, jumladan, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi asosida davlat tomonidan yaqin va uzoq xorijiy davlatlar hamda xalqaro tashkilotlar bilan aloqalarni yana-da mustahkamlash va kengaytirishga qaratilgan tashqi siyosiy faoliyat dunyo hamjamiyati tomonidan alohida eʼtirof etilib, xalqaro maydonda O‘zbekiston tomonidan bildirilgan tashabbuslar qo‘llab-quvvatlanayotgani qalamga olingan. “O‘zbekiston Respublikasi Prezidenti Shavkat Mirziyoyev tomonidan ilgari surilgan mintaqaviy va global muammolar yechimi bo‘yicha xalqaro tashabbuslar asosida BMT Bosh Assambleyasining 4 ta maxsus rezolyutsiyasi qabul qilindi”, - deb yozadi muallif.
Taʼkidlanishicha, maqolada O‘zbekiston Respublikasining shartnomaviy-huquqiy bazasini 4 ming 200 dan ortiq hujjat tashkil etib, ulardan 500 ga yaqini universal va mintaqaviy xarakterga ega bo‘lgan ko‘p tomonlama xalqaro shartnomalardan iborat ekanligi, 3 ming 700 dan ortig‘i esa ikki tomonlama xalqaro hujjatlar hisoblanishi ham jurnalxonlarning eʼtiboriga havola qilingan.
Shuningdek, nashr so‘nggi besh yil davomida O‘zbekistonning xorijiy hamkorlar bilan 781 ta xalqaro hujjatni imzolaganiga, O‘zbekistonning 26 ta universal xalqaro shartnomalarning aʼzosiga aylanganiga ham eʼtibor qaratgan. Unda “ushbu xalqaro shartnomalar asosan investitsiyalarni rag‘batlantirish va o‘zaro himoya qilish, savdo-iqtisodiy, harbiy-texnikaviy, moliyaviy, madaniy-gumanitar, ilmiy-texnikaviy hamkorlik, soliq, mehnat, transport, energetika, atrof-muhitni muhofaza qilish, huquqiy yordam ko‘rsatish, jinoyatchilikka qarshi kurashish kabi sohalarga taalluqli” ekanligi qayd etilgan.
Eslatib o‘tamiz, avvalroq Prezident Shavkat Mirziyoyevning BMT Bosh Assambleyasining 76-sessiyasidagi nutqi Janubiy Koreya matbuoti, O‘zbekiston istiqlolining o‘ttiz yilligiga bag‘ishlab bunyod etilgan “Yangi O‘zbekiston” bog‘i va Mustaqillik monumentining tantanali ochilishi haqidagi maqola «The Korea Post» jurnali sahifalarida hamda davlatimiz rahbarining "Yangi O‘zbekiston" gazetasiga bergan intervyusi matni «El Mundo Financiero» xalqaro internet-nashrida ispan tilida chop etilgani haqida xabar berilgandi.
