Shirkatlar tomonidan 1 milliard 809 million so‘m talon-taroj qilingani aniqlandi
O‘zbekiston Respublikasi Uy-joy kommunal xizmat ko‘rsatish vazirligining rasmiy maʼlumotlariga ko‘ra, vazirlik huzuridagi ko‘p xonadonli uy-joy fondidan foydalanishni nazorat qilish inspeksiyasi o‘tkazgan tekshiruv natijasida bir qator qonunbuzarlik holatlari aniqlangan.
Jumladan, mulkdorlardan yig‘ilgan majburiy badal pullari maqsadsiz ishlatilgani bo‘yicha 49 ta holatda jami 1 milliard 809,5 million so‘m mablag‘ talon-taroj qilingan. Bu holat bo‘yicha Toshkent viloyati (950,1 million so‘m ) “yetakchi”lik qilmoqda.
Shuningdek, viloyatlar kesimida Navoiy viloyatida 5 ta holat bo‘yicha 449,4 million so‘m, Farg‘ona viloyatida 4 ta holat bo‘yicha 300,1 million, Qashqadaryo viloyatida 3 ta holat bo‘yicha 67,9 million, Buxoro viloyatida 10 ta holat bo‘yicha 42,1 million so‘m maqsadsiz ishlatilgan.
Aniqlangan qonunbuzilish holatlari yuzasidan to‘plangan materiallar huquqni muhofaza qiluvchi idoralarga taqdim etilgan.
Avvalroq Toshkentda 400 million so‘mdan ortiq pulni talon-taroj qilgan shirkat rahbari qo‘lga tushgani, Sergelida 325 ming dollarni o‘zlashtirib yuborgan bank kassiri va bosh mutaxassisga nisbatan jinoyat ishi qo‘zg‘atilgani haqida xabar berilgandi.
Cho‘lponoy Ahmedova
