“Tolibon”: Sobiq hukumat boshqa tiklanmaydi
“Tolibon” vakili Afg‘onistonda sobiq hukumatni tiklashga urinish befoyda ekanini maʼlum qildi. Bu haqda “TOLONews” xabar berdi.
Harakat vakillaridan biri Inomullo Samanganiy sobiq hukumat aʼzolarini tiklashga oid xabarlar yolg‘on ekanini aytgan. “Sobiq adminstratsiya tiklanishi haqidagi mish-mishlar yolg‘on”, — degan Samanganiy.
Bu 28-sentabr kuni bir guruh sobiq hukumat vakillari bildirgan bayonotga javob tariqasida aytildi. Bu bayonot Afg‘onistonning Shveysariyadagi elchixonasi Twitter sahifasida eʼlon qilingan. Unda sobiq amaldorlar Afg‘onistonning quvg‘indagi hukumati qayta tuzilishini bildirgan. Unda Afg‘oniston hududidagi har qanday boshqa hukumat noqonuniy, deb tan olinadi deyilgan. Shu bilan birga boshqa davlatlardan toliblar hokimiyatini tan olmaslik so‘ralgan. Afg‘onistoning sobiq vitse-prezidenti Amrulla Solih vaqtinchalik prezident sifatida ko‘rsatilgan.
Avvalroq AQSH Afg‘onistonga chegaradosh davlatlar bilan muzokara o‘tkazayotgani hamda toliblar Tojikistonga ogohlantirish bilan chiqqani xabar qilingandi
Jahongir Qo‘ziyev
