Ханафий Имомали Раҳмоннинг инклюзив ҳукумат тузиш зарурлиги ҳақидаги баёнотига жавобан унга Афғонистон ички ишларига аралашмасликни маслаҳат берди. Акс ҳолда унинг бу ҳаракатлари жавобсиз қолмайди. Бундан аввал бош вазир биринчи ўринбосари Мулла Абдулғани Бародар ҳам шу каби огоҳлантириш билан чиққанди.
Шунингдек, бош вазир иккинчи ўринбосари “Толибон”нинг бутун дунё, хусусан, АҚШ билан дипломатик алоқалар ўрнатиш истагини маълум қилди. “Агар жаҳон ҳамжамияти “Толибон”нинг терроризм ва наркотрафикни йўқ қилишини хоҳласа, Ислом амирлигини тан олиши керак”, – деб қўшимча қилган у. Ханафийнинг фикрича, толиблар тан олинишида Хитой катта роль ўйнаши мумкин. Чунки Пекин БМТ Хавфсизлик кенгашининг доимий аъзоси ҳисобланади. Шу билан бирга Қатарнинг Афғон муаммосидаги ўрни ҳақида гапирар экан, унинг хатти-ҳаракатларини олқишлаган. Доҳанинг афғон халқига гуманитар ёрдам беришда давом этишига умид билдирилган.
Бундан аввал Афғонистоннинг собиқ президенти Ашраф Ғанининг Facebook' саҳифаси бузиб кирилгани ҳамда Бельгияда Афғонистон элчихонаси эгаллаб олингани хабар қилинганди.
Жаҳонгир Қўзиев