Gruziyaning sobiq prezidenti Saakashvili mamlakatga qaytganini eʼlon qildi
Gruziyaning sobiq prezidenti Mixail Saakashvili vataniga qaytganini Facebookdagi sahifasida eʼlon qildi.
Maʼlum bo‘lishicha, Saakashvili 27-sentabr kuni 2-oktabrga Tbilisiga chipta sotib olganini aytgan. Qayd etilishicha, shu kuni mamlakatda mahalliy hokimiyat organlariga saylovlar bo‘lib o‘tishi rejalashtirilgan. Siyosatchining so‘zlariga ko‘ra, u fuqarolarning xohish-irodasini himoya qilish, shuningdek, “Gruziyani qutqarishda” ishtirok etish niyatini bildirgan. U o‘zining ijtimoiy tarmoqdagi sahifasi orqali o‘z harakatlariga quyidagicha izoh bergan:
“Xayrli tong, Gruziya, 8 yildan keyin Gruziyadaman. Bugun men siz bilan bo‘lish uchun tavakkal qildim. Tbilisida ko‘rishguncha!”
Taʼkidlanishicha, Gruziya Ichki ishlar vazirligida uning mamlakat hududida ekani haqida maʼlumot yo‘q.
Maʼlumot o‘rnida: mamlakatda unga nisbatan bir nechta jinoiy ish qo‘zg‘atilib, bir necha bor qamoq jazosiga hukm qilingan. Hukumat Saakashvili qaytishi bilanoq hibsga olinishini bildirgan.
Avvalroq, Gruziya bosh vaziri Mixail Saakashvili vatanga qaytsa, tezda qamoqqa olishini aytgandi.
Cho‘lponoy Ahmedova
