Qurilishning ilk bosqichida uy sotish mumkin emas: yangi tartib joriy etildi

 

Qirg‘izistonda qurilish kompaniyalariga poydevor va yer osti qurilish ishlari to‘liq yakunlanmaguncha turar joy va noturar joy binolarini sotish, ulushli ishtirok shartnomalarini tuzish hamda loyihalarni reklama qilish taqiqlandi.

 

Ma'lum qilinishicha, tegishli buyruqni mamlakat Qurilish, arxitektura, uy-joy va kommunal xizmatlar vaziri Nurdan Oruntayev imzolagan.

 

Yangi talabga ko‘ra, qurilishning nolinchi sikli yakunlangunga qadar ishlab chiquvchilarga quyidagilar taqiqlanadi:

• qurilish loyihalaridagi turar joy va noturar joy binolarini sotish;

• fuqarolar va yuridik shaxslardan qurilish uchun mablag‘ jalb qilishni nazarda tutuvchi ulushli ishtirok shartnomalari, dastlabki kelishuvlar va boshqa fuqarolik-huquqiy bitimlarni tuzish;

• qurilish loyihalarini reklama qilish.

 

Nolinchi sikl deganda poydevorni o‘rnatish va yer osti qurilish ishlarini to‘liq yakunlash bosqichi tushuniladi.

 

Mazkur talablar bajarilishini Davlat arxitektura va qurilish nazorati departamenti kuzatib boradi. Jumladan, noqonuniy reklama, kvartiralarni sotish tashabbuslari va qurilish uchun mablag‘ yig‘ish holatlari aniqlansa, departament o‘z vakolatlari doirasida tegishli choralar ko‘radi.

 

Qurilish vazirligi qurilish kompaniyalari bilan yangi tartib bo‘yicha tushuntirish ishlarini olib borayotganini bildirgan. Kompaniya rahbarlariga yangi talablar yuzasidan ko‘rsatmalar berilib, ularga rioya qilmaslik uchun jarimalar mavjudligi haqida ogohlantirilgan.

 

Vazirlikning ta’kidlashicha, yangi tartib uy sotib oluvchilarning mablag‘lari va huquqlarini himoya qilish, shuningdek, qurilishi hali boshlang‘ich bosqichda bo‘lgan loyihalarga investitsiya kiritish bilan bog‘liq xavflarni kamaytirishga qaratilgan.