Turkmaniston Prezidenti Toshkentga keldi
O‘zbekiston Prezidenti Shavkat Mirziyoyevning taklifiga binoan Turkmaniston Prezidenti Gurbanguli Berdimuhamedov 4-oktabr kuni rasmiy tashrif bilan mamlakatimizga keldi.
Prezident matbuot xizmati xabariga ko‘ra, Islom Karimov nomidagi Toshkent xalqaro aeroportida oliy martabali mehmonni Prezident Shavkat Mirziyoyev kutib oldi.
Gurbanguli Berdimuhamedov davlatimiz rahbari hamrohligida Mustaqillik maydoniga tashrif buyurib, Mustaqillik va ezgulik monumenti poyiga gul qo‘ydi.
Qayd etilishicha, O‘zbekiston va Turkmaniston Prezidentlarining muzokaralari ertaga, 5-oktabr kuni Ko‘ksaroy qarorgohida bo‘lib o‘tadi.
Avvalroq Prezident Shavkat Mirziyoyev 4-oktabr kuni Amerika Qo‘shma Shtatlari Davlat kotibining birinchi o‘rinbosari Uendi Sherman boshchiligidagi delegatsiyani qabul qilgani haqida xabar berilgandi.
