Sovrin jamg‘armasi 40 million dollar bo‘lgan musobaqa qizg‘in pallaga kirdi
Ayni kunlarda Ruminiya poytaxti Buxarest shahrida “Dota 2” bo‘yicha “The International 10” (norasmiy jahon chempionati) o‘tkazilmoqda.
Musobaqaning mukofot jamg‘armasi 40 million dollarni tashkil etadi. Bu kibersport bo‘yicha rekord summa hisoblanadi. Turnirda birinchi o‘rinni qo‘lga kiritgan jamoa 18 million dollar mukofot puliga ega bo‘ladi. Ikkinchi o‘rinni olgan jamoa 5 million dollar hamda uchinchi o‘rinni egallagan jamoa 3 million 600 dollar sohibi bo‘ladi. Chempionatda ayni kunlarda guruh bosqichi o‘z yakuniga yetdi. Mazkur bosqichga o‘n olti jamoa yo‘l oldi. Musobaqa chempionligiga asosiy davogarlar “PSG.LGD”, “Visi Gaming”, “Team Sekret”, “Invistus Gaming”, “OG” va Rossiyaning “Virtus.pro” jamoalari hisoblanadi.
Musobaqaning so‘nggi g‘olibi “OG” jamoasi bo‘lib, uning hozirgi jamg‘armasi 34 million dollarni tashkil etadi. Ushbu turnir har yili bo‘lib o‘tadi. Biroq so‘nggi ikki yilda musobaqa pandemiya sababli qoldirilgan edi. Chempionatning grand final uchrashuvi 17-oktabr kuni o‘tkaziladi.
Avvalroq Osiyo o‘yinlarida kibersport bo‘yicha medallar o‘ynaladigan yo‘nalishlar tasdiqlangani va Olimpiada sovrindori davlat tomonidan sovg‘a qilingan “BMW X3” mashinasini sotgani haqida xabar berilgandi.
Jamshidbek Amirov
