"Tolibon" G‘arb davlatlaridan sanksiyalarni bekor qilishni so‘radi
"Tolibon" hukumati tashqi ishlar vaziri Amirxon Mutaqqiy G‘arb davlatlaridan sanksiyalarni bekor qilishni so‘radi. Mutaqqiy bu haqda Dohada, AQSH va Yevropa Ittifoqi vakillari bilan uchrashuvda aytib o‘tgan.
"Tolibon" bosh diplomatining fikricha, amaldagi afg‘on hukumatining zaiflashuvidan AQSH va Yevropa ham manfaatdor emas. Sababi bu xavfsizlik va migratsiya bilan bog‘liq vaziyatni yana-da keskinlashtiradi. Shuningdek, sanksiyalarni bekor qilish orqali Afg‘oniston bank tizimi faoliyati va davlat xizmatchilariga maosh to‘lashni tiklashi mumkin.
"Tolibon"ning yana bir vakili, axborot va madaniyat vaziri vazifasini bajaruvchi Xayrulla Xayrxva ham AQSHni harakat rahbariyatiga nisbatan joriy qilingan sanksiyalarni bekor qilishga chaqirdi. "Amerika "Tolibon" rahbariyatini terrorchilar ro‘yxatiga kiritish to‘g‘risidagi nuqtayi nazarini qayta ko‘rib chiqishi kerak. Ular shu orqali Afg‘oniston hukumatiga bosim o‘tkazmoqda. Biz diplomatik uslublardan foydalanishni so‘raymiz, sababi bosim bilan hech narsaga erishib bo‘lmaydi", — degan vazir.
Xayrxva "Tolibon" barcha majburiyatlarini bajarib bo‘lganini, ammo xalqaro hamjamiyat bu borada qadam tashlamaganini maʼlum qilgan. Shuningdek, Afg‘oniston hududida ISHID tahdidi mavjud emasligi taʼkidlangan.
Bundan avval "Tolibon" rasmiy vakili Zabihullo Mujohid NATOni diplomatik tilda muloqot qilishga chaqirgandi. Shuningdek, Ozarbayjon prezidenti toliblar hukumatini eng avvalo Afg‘oniston qo‘shnilari tan olishi lozimligini aytgandi.
Jahongir Qo'ziyev
