O‘zbekistonda amalga oshirilayotgan tub islohotlar — "The Korea Times" nigohida
O‘zbekistonning Koreya Respublikasidagi elchisi Vitaliy Fen ushbu mamlakatdagi yetakchi nashrlardan biri — "The Korea Times" gazetasi prezidenti O Yong Jin bilan uchrashdi. Bu haqda “Dunyo” AA xabar bermoqda.
Muloqot chog‘ida O‘zbekistondagi siyosiy-huquqiy va iqtisodiy-ijtimoiy sohalarda amalga oshirilayotgan keng ko‘lamli islohotlarga bag‘ishlangan turkum maqolalarning "The Korea Times" gazetasi sahifalarida doimiy ravishda chop etilayotgani hamda ushbu mamlakat keng jamoatchiligiga yetkazilayotgani katta mamnuniyat bilan taʼkidlandi.
Qayd etilishicha, O Yong Jin O‘zbekiston elchixonasi bilan olib borilayotgan uzoq yillik hamkorlik samarasi o‘laroq, mamlakatimiz, uning xalqi va madaniyatiga nisbatan yuksak hurmat shakllanganini aytib o‘tdi. Uning so‘zlariga ko‘ra, so‘nggi yillarda davlatimiz rahbari tashabbusi bilan amalga oshirilgan tub islohotlar, izchil va faol tashqi siyosat respublikaning dunyo hamjamiyatida mavqeini yana-da oshirishga hissa qo‘shmoqda.
Uchrashuvda o‘zaro hamkorlikni bundan-da faollashtirish, yurtimiz hayotidagi muhim tadbirlarni ushbu nufuzli nashrning sahifalarida keng yoritib borishga kelishib olindi.
Maʼlumot uchun, "The Korea Times" Janubiy Koreyada ingliz tilida chop etiladigan uchta yirik gazetalardan biri hisoblanadi. 1950-yilda asos solingan nashr har kuni 400 ming adadda chop etiladi. Gazeta nafaqat Janubiy Koreya, balki chet elda ham o‘z o‘quvchilariga ega. Nashr dunyoning qator yirik nashrlari bilan yaqindan hamkorlik o‘rnatgan.
Eslatib o‘tamiz, O‘mon Sultonligining "Asdaa Oman" gazetasida "Saylovoldi tayyorgarlik ishlari yakunlangach, 24-oktabr kuni O‘zbekistonda Prezident saylovlari o‘tkaziladi" sarlavhali maqola chop etilgandi.
Avvalroq Hindistondagi “Political Events” jurnali sahifasida “Yangi O‘zbekiston zamonaviy tashqi siyosatining xalqaro-huquqiy asoslari mustahkamlanmoqda” sarlavhali maqola bosilib chiqqani hamda “Yangi O‘zbekiston” bog‘i va Mustaqillik monumentining tantanali ochilishi Janubiy Koreyaning "The Korea Post" jurnali sahifalarida chop etilgani haqida xabar berilgandi.
