“Tutqunlik” badiiy filmi namoyish etildi
Bugun, 16-oktabr kuni O‘zbekiston Respublikasi Prezidenti saylovi jarayonlarini yoritishga ko‘maklashish maqsadida tashkil qilingan “Xalqaro media xoll”da Kinematografiya agentligi tomonidan Davlat xavfsizlik xizmati ko‘magida suratga olingan “Tutqunlik” badiiy filmi taqdimoti bo‘lib o‘tdi. Taqdimot marosimida “Media xoll”da faoliyat olib borayotganlar, talaba va kursantlar ishtirok etdi.
Film real voqealarga asoslangan bo‘lib, uni taniqli rejissyor Rashid Malikov suratga olgan.
– Yangi O‘zbekiston sharoitida inson shaʼni, qadr-qimmati, vijdon va eʼtiqod erkinligi singari oliy qadriyatlarga davlat siyosati darajasida eʼtibor qaratila boshlandi. Bu o‘zgarishlar zamonaviy o‘zbek kinosida ham o‘z aksini topmoqda. “Tutqunlik” badiiy filmida Prezidentimiz tashabbusi bilan tashkil etilgan “Mehr” operatsiyasining mazmun-mohiyati, inson qadr-qimmati, Vatan sog‘inchi, tinchlik va farovonlikning qanchalik tansiq neʼmat ekanligi haqida so‘z yuritiladi. Film taqdimoti shu paytga qadar bir necha bor turli doiralarda o‘tkazildi. Jumladan, “Ipak yo‘li durdonasi” XIII Toshkent xalqaro kinofestivalida xorijiy kino jamoatchiligi tomonidan alohida eʼtirof etildi. Biz ijtimoiy ahamiyatini eʼtiborga olib, mazkur filmni telekanallarimiz orqali ham xalqimizga namoyish etamiz, – deydi O‘zbekiston Respublikasi Kinematografiya agentligi bosh direktori, film bosh prodyuseri Firdavs Abduxoliqov.
–Biz ushbu filmni suratga olishdan avval juda ko‘p maʼlumotlar to‘pladik, “Mehr” operatsiyasi tufayli O‘zbekistonga olib kelingan ayollar bilan suhbatlashdik, ularning taqdiri, ruhiyati, xarakterini chuqur o‘rgandik– deydi film rejissyori Rashid Malikov. – Ularni noto‘g‘ri yo‘lga kirib qolgan jinoyatchi emas, oddiy inson, ayol sifatida ko‘rsatishga harakat qildik. Shu bois, tomoshabinlar bu filmni shunchaki kino emas, bugungi hayotimiznning aks-sadosi, taqdir zarbasiga duch kelgan zamondoshlarimiz qismatining ekrandagi ifodasi deb qabul qilishlarini so‘rardim.
Taʼkidlash joizki, “Mehr” operatsiyasi doirasida 2019-yilning may oyidan buyon Yaqin Sharqdagi urush o‘choqlaridan 531 nafar hamyurtimiz O‘zbekistonga qaytarilgan.
Maʼlumot uchun: “Tutqunlik” badiiy filmi 16 oktabr kuni “O‘zReport” telekanalida 21:30da, 17-oktyabr kuni “Sevimli TV”da 22.20 da, “Zo‘rTV”da 14.15 da, “Mening yurtim”da 15.00 da, “RenessansTV”da 20.30da, 18-oktabrda “Renessans TV”da 12.00 da namoyish qilinadi.
Bundan avval O‘zEOAVMA, “Yuksalish” umummilliy harakati va O‘zbekiston Yoshlar ittifoqi tomonidan tashkil qiliingan “Xalqaro media xoll”ning ochilish marosimi bo‘lib o‘tgani haqida xabar berilgandi.
Maftuna Rejabboyeva tayyorladi
