Abramovich Azarni Londonga qaytarmoqchi
Londonning “Chelsi” klubi “Real” bilan bir vaqtda bir nechta futbolchi borasida faol muzokaralar olib bormoqda.
Ulardan biri — hujumchi Eden Azar hisoblanadi. Xabarlarga ko‘ra, “Chelsi” xo‘jayini Roman Abramovich o‘z jamoasi Yevropada yetakchilik mavqeini saqlab qolishi uchun tarkibni kuchaytirishning turli variantlarini ko‘rib chiqmoqda. Rossiyalik mulkdor uchun ustuvor tanlovlardan biri bu “aristokratlar”ga nafaqat o‘yin nuqtai nazaridan, balki tasvir nuqtai nazaridan ham foyda keltiradigan Eden Azarning qaytishidir. “Chelsi” Azar uchun 50 million yevro to‘lashga tayyor. “Real” Azarga nisbatan ishonchni yo‘qotgan. Shuning uchun futbolchi borasida har qanday taklifni ko‘rib chiqishga tayyor. Shunga qaramay, Florentino Peres hali ham belgiyalik uchun kamida 60 million yevro talab qilmoqda.
Eslatib o‘tamiz, “Azar” “Real”ga 2019 yilning yozida 115 million yevro evaziga ko‘chib o‘tgandi. Bungacha u “Chelsi” safida yetti yil davomida to‘p surgan. Faoliyatining boshida “Lill”da o‘ynagan. Azarning “Real Madrid” bilan shartnomasi 2024 yilgacha tuzilgan.
Ispaniya chempionatining joriy mavsumida Azar 7 ta o‘yinda ishtirok etib, 1 ta gol urdi.
Avvalroq UEFA Angliyani jazolamoqchi ekanligi va “PSJ” Ikardini Agueroga almashtirmoqchiligi haqida xabar berilgandi.
Jamshidbek Amirov
