Boks. Jahon chempionatining ikkinchi kunida yurtimiz sharafini kimlar himoya qilishi maʼlum bo‘ldi
Bugun musobaqada uch nafar bokschimiz ringga ko‘tariladi.
25-oktabrdan boshlab Serbiyaning Belgrad shahrida boks bo‘yicha jahon chempionatiga start berildi. Kecha ushbu nufuzli turnirning dastlabki kungi bellashuvlari bo‘lib o‘tdi. Unda Asadxo‘ja Mo‘ydinxo‘jayev hamyurtlarimizdan birinchilardan bo‘lib janglarni boshlab berdi. Irlandiyalik Brendon Makkiverga qarshi kechgan to‘qnashuvda sportchimiz yaqqol ustunlik bilan g‘alaba qozondi.
Bugun ham bir qator bokschilarimiz ringga ko‘tariladi. Xususan, -80 kg vaznda Odiljon Aslanov tanzaniyalik Yusuf Changalaveyga qarshi bahs olib borsa, Rio Olimpiyadasi chempioni Hasanboy Do‘stmatov -51 kg vaznda qozog‘istonlik raqibi Saken Bobosinovni sinovdan o‘tkazadi. Shuningdek -75 kg vazn toifasida Saidjamshid Jafarov slovakiyalik L.Ferneza bilan keyingi bosqich yo‘llanmasi uchun kurash olib boradi.
Avvalroq professional boks kechasida o‘zbekistonlik murabbiyning shogirdi g‘alaba qozongani va O‘zbekiston boks terma jamoasining tarkibi eʼlon qilingani haqida xabar berilgandi.
Jamshidbek Amirov
