Saakashvili mavzusi 30-oktabrdan keyin ko‘pchilikning esidan chiqib ketadi — Irakliy Kobaxidze
Bunga nima sabab bo‘lishi aytildi.
Gruziya hukmron partiyasi – “Gruziya orzusi” yetakchisi Irakliy Kobaxidze Saakashvili Tbilisining Ukraina bilan munosabatlarini qiyinlashtirganini maʼlum qildi. Bu haqda “TASS” xabar berdi.
“Mixail Saakashvili ikki davlat munosabatlariga noqulaylik olib kirgan faktor bo‘ldi”, – degan Kobaxidze. Shuningdek, u 30-oktabrdan keyin Saakashvili mavzusi noaktual bo‘lib qolishiga umid bildirgan. Shu kuni Gruziyada mahalliy munitsipal saylovlarining ikkinchi turi bo‘lib o‘tadi.
”Sizni ishontirib ayta olamanki, Saakashvili mavzusi 30-oktabrdan keyin kun tartibidan butkul tushib qoladi. Shundan keyin Ukraina va Gruziya o‘rtasidagi barcha noqulay holatlar ham barham topadi”, – deb taʼkidladi siyosatchi.
Maʼlumot o‘rnida: Saakashvili 1-oktabr kuni qamoqqa olingan. U Gruziyaga 8 yillik tanaffusdan so‘ng qaytib keldi. Saakashvili 2004-2013 yillarda mamlakatni boshqargan. Shundan keyin u Ukraina fuqaroligini qabul qilgan va bir qancha lavozimlarda ishlagan.
Bundan avval Saakashvili Gruziyaga nima uchun kelgani hamda uning salomatligi jiddiy yomonlashgani xabar qilingandi.
Jahongir Qo'ziyev
