Saakashvilining ochlik eʼlon qilgani ko‘zbo‘yamachilikdan boshqa narsa emas — Irakliy Kobaxidze
Sobiq prezident kuniga uch litr limonad ichishi maʼlum bo‘ldi.
Gruziya hukmron partiyasi rahbari Irakliy Kobaxidze Mixail Saakashvilining ochlik eʼlon qilganini “ko‘zbo‘yamachilik” deb atadi. Bu haqda “Ria Novosti” xabar berdi.
“Saakashvilining yasama ochligiga keladigan bo‘lsak, u aynan bugun, saylovlar kuni simulyatsiya ishlatmoqchi va o‘z tarafdorlari hissiyotlarini uyg‘otmoqchi”, – degan Kobuxidze.
Uning so‘zlariga ko‘ra, Saakashvili ochlik eʼlon qilganiga qaramay, kuniga uch litr limonad isteʼmol qiladi.
Maʼlumot o‘rnida: Saakashvili 1 oktyabr kuni qamoqqa olingan. U Gruziyaga 8 yillik tanaffusdan so‘ng qaytib keldi. Saakashvili 2004-2013 yillarda mamlakatni boshqargan. Shundan keyin u Ukraina fuqaroligini qabul qilgan va bir qancha lavozimlarda ishlagan.
Gruziyada bugun, 30 oktyabr kuni mahalliy boshqaruv organlariga saylovlarning ikkinchi turi bo‘lib o‘tmoqda.
Bundan avval Saakashvili vrachlarni qabul qilishdan bosh tortgani hamda Saakashvili tufayli Gruziyaning Ukraina bilan munosabatlari sovuqlashgani xabar qilingandi.
