Xakerlar bir guruh mashhur shaxslarga tegishli maʼlumotlarni o‘g‘irladi
Ularning orasida Donald Tramp xam bor.
Bir guruh xakerlar Graff Diamonds zargarlik do‘koni serverlaridan mashhur shaxslarga oid hujjatlar o‘g‘irlandi. Bu haqda Daily Mail xabar berdi.
Bu shaxslar orasida mashhur futbolchi Devid Bekxem, teleboshlovchi Opra Uinfri, aktyorlardan Tom Xenks, Semyuel L.Jekson, Alek Bolduin, shuningdek, AQSH sobiq prezidenti Donald Tramp va uning rafiqasi Melanya Tramplar bor. Xakerlar mijozlar ro‘yxati, to‘lov kvitansiyalari va cheklar kabi hujjatlarni o‘g‘irlagan.
Bu maʼlumotlar xaridorlarni noqulay vaziyatga solib qo‘yishi mumkin, sababi ular qimmatbaho sovg‘alarni sirli ravishda o‘z jazmanlariga sotib olgan bo‘lishi mumkin
– deyiladi xabarda.
Xakerlar hozirda darknetda do‘konning 11 ming xaridoriga tegishli 69 ming hujjatni eʼlon qilgan. Ekspertlar maʼlumotlariga ko‘ra, jinoyatchilar do‘kon xodimlarining pochtasiga maxsus virus jo‘natish orqali yuqoridagi maʼlumotlarni qo‘lga kiritgan.
Graff Diamonds maʼlumotlari o‘g‘irlangan barcha mijozlariga bu haqda xabar berilganini maʼlum qilgan.
Avvalroq Rossiyalik xakerlar Amerika kompaniyasidan 5,9 million dollar talab qilgani haqida xabar berilgandi.
Jahongir Qo'ziyev
