Gruziya prezidenti Mixail Saakashvilini afv etish bo'yicha o'z qarorini aytdi
Bu haqda u millatga telemurojaat paytida ma'lum qilgan.
Gruziya prezidenti Salome Zurabishvili hech qachon Mixail Saakashvilini afv qilmasligini maʼlum qildi.
"Sobiq prezidentning afv qilinishi bo‘yicha mening pozitsiyam aniq — yo‘q va hech qachon. Bu masalaga boshqa qaytmayman", — degan Gruziya rahbari.
Shuningdek, u sobiq hamkasbini siyosiy mahbus deb hisoblamasligini qayd etdi.
"Sobiq prezident siyosiy mahbus bo‘lish uchun talab etiladigan shartlarga mos emas. U mamlakatga o‘z xohishi bilan va noqonuniy qaytib keldi. Saakashvilining maqsadi vaziyatni beqarorlashtirish edi", — deb qo‘shimcha qilgan Zurabishvili.
Shu bilan birga prezident Аdliya vazirligidan Saakashvilini alohida mahbus sifatida ko‘rilishini so‘ragan va uning salomatligini doimiy nazorat qilib turishga topshiriq bergan. Zurabishvilining fikricha, sobiq prezident sog‘lig‘i yomonlashuvidan turli siyosiy kuchlar mamlakatdagi vaziyatni beqarorlashtirish maqsadida foydalanishi mumkin.
Bundan avval Saakashvilini sudda himoya qilish uchun Ukraina va AQSHdan ham advokatlar jalb qilinishi hamda uning qamoqxonada kuniga uch litr limonad ichishi xabar qilingandi.
Jahongir Qo'ziyev
