"Tolibon" yangi tayinlovlarni amalga oshirdi
Bu harakat hokimiyatini yana-da mustahkamlaydi.
“Tolibon” yakshanba kuni yangi tayinlovlarni amalga oshirdi. Bu haqda “Reuters” agentligi xabar berdi.
Harakat Afg‘oniston boshqaruvidagi 44 muhim lavozimlarga o‘z tarafdorlari vakillarini tayinlagan. Xususan, Qori Baryol Kobul gubernatori, Vali Jon Hamza esa shahar politsiyasi boshlig‘i lavozimini egallagan. Kobul xavfsizligi uchun javobgar bo‘lgan Xamidulla Muxlis bir necha kun avval shifoxonaga qilingan hujum oqibatida halok bo‘lgan edi.
Bu “Tolibon” sentabr oyida hukumat tarkibini eʼlon qilgandan keyin amalga oshirilgan yirik tayinlov bo‘lib, “Reuters”ning taʼkidlashicha, harakatning hokimiyatini jiddiy ravishda mustahkamlanishiga sabab bo‘ladi.
Avvalroq AQSHning Afg‘oniston bo‘yicha vakili Yevropa va Osiyo bo‘ylab safar qilishi hamda "Tolibon" saflarida keng ko‘lamli “tozalash” ishlari boshlangani haqida xabar qilingandi.
Jahongir Qo'ziyev
