"Толибон" сафларида кенг кўламли "тозалаш" ишлари бошланди
Октябрь ойида шу мақсадда махсус комиссия тузилган эди.
“Толибон” хизмат вазифасини суистеъмол қилган 200 кишини ўз сафидан чиқариб юборди. Бу ҳақда “РИА Новости” хабар берди.
Октябрь ойида “Толибон” махсус комиссия тузган эди. Бу комиссия давлат хизматига ноқонуний йўллар билан кирган амалдорларни ишдан бўшатиш билан шуғулланади. Ташкилотга мудофаа, ички ишлар ва хавфсизлик вазирлиги вакиллари киритилган.
Ушбу комиссиядаги манбалардан бири шу кунга қадар 200 киши эгаллаб турган лавозимидан озод қилинганини маълум қилган. Шунингдек, ушбу жараён давом этаётгани таъкидланган. Манбанинг қўшимча қилишича, бўшатилган 200 киши ўз хизмат вазифасини суистеъмол қилган ва “Толибон” номидан шахсий мақсадлари йўлида фойдаланган. Бундан ташқари, ушбу қўмита иш бошлагандан кейин шаҳарларда бошқарув яхшилангани қайд этилган.
Бундан аввал "Толибон" Эрон билан таълим соҳасида ҳамкорлик қилмоқчи экани ҳамда Афғонистон Хитой билан савдосини тиклагани ҳақида хабар берилганди.
Жаҳонгир Қўзиев
