Pokiston va Xitoy Afg‘oniston masalasi bo‘yicha uchrashuvda ishtirok etmasligi maʼlum qilindi
Bu uchrashuv Hindiston tashabbusi bilan o‘tkazilmoqda.
Xitoy 10 noyabr kuni Hindiston tashabbusi bilan o‘tkaziladigan Afg‘onistonda xavfsizlik masalasi bo‘yicha muloqotda ishtirok etishdan bosh tortdi. Bu haqda The Hindu gazetasi xabar berdi.
Gazeta manbalariga ko‘ra, milliy xavfsizlik masalalari bo‘yicha maslahatchilar yoki xavfsizlik kengashi kotiblari darajasidagi uchrashuvda Xitoy vakili o‘z grafigi tig‘izligi sababli ishtirok eta olmasligini maʼlum qilgan.
“Biz Pekinning ushbu muloqotda ishtirok etishidan manfaatdor edik. Sababi bu Afg‘onistondagi vaziyatning nomaʼlumligi ortidan kelib chiqadigan tahdidlarga bo‘lgan umumiy tushunchalarning shakllanishiga yordam berardi”, – degan nashr manbasi.
Bundan avval Pokiston milliy xavfsizlik agentligi rahbari Moid Yusuf ham uchrashuvda ishtirok etmasligini maʼlum qilgan.
Hindiston TIV maʼlumotlariga ko‘ra, Afg‘onistonda xavfsizlik masalasi bo‘yicha mintaqaviy muloqotda O‘zbekiston, Eron, Qozog‘iston, Qirg‘iziston, Rossiya, Tojikiston, Turkmaniston va Rossiya vakillari ishtirok etadi.
Avvalroq “Tolibon” Pokistonga diplomatik yordam berayotgani hamda "Tolibon" yangi tayinlovlarni amalga oshirgani haqida xabar qilingandi.
Jahongir Qo'ziyev
