Gruziyada bir guruh deputatlar ochlik eʼlon qildi
Ularning barchasi Saakashvilini boshqa kasalxonaga o‘tkazilishini talab qilmoqda.
Gruziya parlamentining to‘qqiz nafar deputati Mixail Saakashvilini qo‘llab-quvvatlab ochlik eʼlon qildi. Bu haqda “RIA Novosti” xabar berdi.
Ularning barchasi muxolif partiya vakillari hisoblanadi. Deputatlar sobiq prezidentning zudlik bilan ko‘p tarmoqli fuqarolik klinikasiga o‘tkazilishini talab qilmoqda.
“Вiz, parlamentning to‘qqiz aʼzosi Mixail Saakashvilini malakali tibbiy xizmatdan foydalanishi uchun ko‘p tarmoqli klinikaga o‘tkazilishini talab qilib ochlik eʼlon qilishga qaror qildik”, degan deputatlardan biri David Kirkitadze.
Maʼlumot o‘rnida: Saakashvili 1 oktyabr kuni qamoqqa olingan. U Gruziyaga 8 yillik tanaffusdan so‘ng qaytib keldi. Saakashvili 2004-2013 yillarda mamlakatni boshqargan. Shundan keyin keyin u Ukraina fuqaroligini qabul qilgan va bir qancha lavozimlarda ishlagan.
Avvalroq Gruziya xavfsizlik xizmati Saakashvili davlat to‘ntarishi uyushtirmoqchi ekanligi haqida maʼlum qilgandi.
Жаҳонгир Қўзиев
