O‘zbekistonda hafta davomida qanday ob-havo kutilmoqda?
Baʼzi joylarda changli bo‘ron bo‘ladi.
Bugun kunduz kuni respublika hududi bo‘yicha yog‘ingarchiliksiz ob-havo bo‘lishi kutilmoqda. Kun o‘rtasiga borib havo harorati 10-13 daraja iliqqacha ko‘tariladi. Bu haqda “O‘zgidromet” xabar berdi.
Maʼlum qilinishicha, 16 noyabrda O‘zbekiston shimoliy hududlariga, 17-18 noyabrda respublika barcha hududiga Volgabo‘yi orqali Rossiyaning Yevropa hududi (Moskva viloyati) ustida shakllangan nam va sovuq havo massasi kirib keladi.
16-17 noyabrda respublika bo‘yicha shamol tezligi 17-22 m/s gacha kuchayishi kutilmoqda, baʼzida 25-28 m/s gacha kuchayishi mumkin, baʼzi joylarda changli bo‘ron bo‘ladi.
16-noyabrda O‘zbekiston hududining katta qismida havo harorati 13-18 daraja iliq bo‘lgan quruq va iliq ob-havo saqlanib turadi. Faqat Qoraqalpog‘istonda, Xorazm viloyatida asosan qor ko‘rinishidagi yog‘ingarchilik bo‘ladi va harorat 2-5 daraja iliqqacha pasayadi.
17-noyabrda O‘zbekistonning barcha hududlarida yomg‘ir ko‘rinishidagi yog‘ingarchilik bo‘ladi, qorga aylanadi, tog‘oldi va tog‘li hududlarda baʼzi joylarda kuchli bo‘ladi. Harorat kechasi va kunduzi 0-5 daraja iliqqacha, shimolda kechasi 5-8 daraja sovuqqacha, kunduz kuni 0-3 daraja sovuqqacha pasayadi.
18-19 noyabrda O‘zbekiston hududi bo‘yicha yog‘ingarchilik kutilmaydi, faqat respublikaning tog‘li hududlarida 18 noyabrda qor ko‘rinishidagi yog‘ingarchilik saqlanib turadi. Harorat kechalari 5-8 daraja sovuqqacha, shimolda 12-15 daraja sovuqqacha pasayadi, kunduz kunlari 0-5 daraja iliq, shimolda 0-3 daraja sovuq atrofida saqlanib turadi.
