Tornadodan zarar ko‘rgan hududlarga mablag‘ ajratiladi – Bayden
Ofatdan eng ko‘p zarar ko‘rgan Kenttuki shtatida qurbonlar soni yuzga yetishi mumkin.
AQSH prezidenti Jo Bayden hukumat tornadodan vayron bo‘lgan mamlakatning markaziy hududlariga yordam berish uchun barcha imkoniyatlarni ishga solishini aytdi, deb yozadi BBC News.
Prezident jabrlangan hududlarga yordam ko‘rsatish uchun mablag‘ ajratishni topshirdi. Shuningdek, u Kentukki shtatida favqulodda holat eʼlon qildi.
Baydenning so‘zlariga ko‘ra, maxsus guruhlar uylari vayron bo‘lgan yoki jiddiy shikastlanganlarga vaqtinchalik uy-joy berishda qo‘shimcha yordam berish uchun yakshanba kuni Kentukkiga boradi.
Shtat gubernatori Endi Besharning aytishicha, 189 nafar Milliy gvardiya askarlari qurbonlarni qidirish va tiklanish ishlariga yordam berish uchun jalb qilingan. Meyfild shahrida zavodining tomi qulab tushgan, politsiya bo‘limi, o‘t o‘chirish bo‘limi, turar-joy binolari va maʼmuriy binolar butunlay vayron bo‘lgan. Qurbonlar soni 100 dan oshishi mumkin.
Tornado qurbonlari Arkanzas, Missuri, Illinoys shtatlarida ham qayd etilgan.
Avvalroq AQSHning Luiziana shtatiga kuchli to‘fon yopirilgan edi.
