Yangi yil bayrami arafasida "Afrosiyob" poyezdlari qatnovi yana bittaga ko‘payadi
"O‘ztemiryo‘lyo‘lovchi" AJ xabariga ko‘ra, bayram kunlari barcha yo‘lovchi poyezdlarga qo‘shimcha vagonlar ham ulanadi.
Yangi yil bayrami arafasida yo‘lovchilarga yana-da ko‘proq qulaylik hamda ichki turizmni rivojlantirishda qo‘shimcha imkoniyatlar yaratish maqsadida “O‘zbekiston temir yo‘llari” AJ 2021 yil 27 dekabrdan 2022 yil 9 yanvargacha “Toshkent-Buxoro-Toshkent” yo‘nalishida 770/769-sonli “Afrosiyob” zamonaviy poyezdlarining qatnovini yo‘lga qo‘yadi. Bu haqida “O‘ztemiryo‘lyo‘lovchi” AJ xabar berdi.
Unda aytilishicha, Hozirgacha faqat haftaning juma, shanba va yakshanba kunlari soat 09:02 da Toshkent markaziy temir yo‘l vokzalidan harakatini amalga oshirib kelayotgan 770-sonli “Afrosiyob” zamonaviy poyezdi, 27 dekabrdan 2022 yil 9 yanvargacha har kuni soat 09:02 da “Toshkent-Buxoro” yo‘nalishida qatnovini amalga oshiradi.
Bundan tashqari, 769-sonli “Afrosiyob” zamonaviy poyezdi ham 27 dekabrdan 2022 yil 9 yanvargacha har kuni soat 15:02 da “Buxoro-Toshkent” yo‘nalishida qatnovini amalga oshiradi.
Ushbu poyezdlar Samarqand, Navoiy temir yo‘l vokzallarida ham to‘xtab o‘tadi.
Izoh: Qo‘shimcha maʼlumotlarni Toshkent shahrida 1005 qisqa telefon raqami, joylardagi temir yo‘l kassalari hamda maʼlumotlar byurosidan bilib olishingiz mumkin.
Avvalroq “Afrosiyob” poyezdlarining “Toshkent – Buxoro – Toshkent” yo‘nalishida qatnovi yo‘lga qo‘yilishi hamda "Toshkent — Shahrisabz — Toshkent" yo‘lovchi poyezdining harakat jadvali o‘zgarishi haqida xabar berilgandi.
Olamgir Abdiyev
