Buxoroda Milliy gvardiya xodimi xizmat vaqtida vafot etdi
Hozirda aybdorga nisbatan jinoyat ishi qo‘zg‘atilgan.
Buxoro viloyatida 20-dekabr kuni Milliy gvardiya xodimi xizmat vaqtida mashina urib ketishi oqibatida vafot etdi. Bu haqda O‘zA axborot agentligi xabar qildi.
Ma’lum qilinishicha, Milliy gvardiya Qo‘riqlash boshqarmasi safdor xodimlari H.A. va N.O. o‘ziga biriktirilgan hududda xizmatga jalb qilingan. Ular 20 dekabr soat 05:15 atrofida Gazli Neft va gaz qazib chiqarish boshqarmasiga qarashli «Qumli GTK mobil» yo‘nalishinng 34—42-kilometridagi yo‘nalishni qo‘riqlash uchun «Niva» avtomobilida qo‘riqlanadigan hududga boradi.
Xodimlar xizmat vaqtida yo‘nalish quvurining taqiqlangan qismidan «UAZ» avtomashinasi harakatlanib kelayotganini ko‘rgan va unga to‘xtash ishorasini ko‘rsatgan. Haydovchi, Qorako‘l tumani «Kuydim» mahallasida yashovchi A.A. xodimlarning qonuniy talablariga bo‘ysunmay harakatlanishni davom ettirgan va Milliy gvardiya safdori H.A.ni avtomashinaning old qismi bilan qasddan urib yuborgan. Qonunbuzar fuqaro qochib ketgan, xodim esa og‘ir tan jarohati olib, voqea joyida halok bo‘lgan.
Holat yuzasidan A.A.ga nisbatan Jinoyat kodeksining 97-moddasi 2-qismi «g» (xizmat yoki fuqarolik burchini bajarishi munosabati bilan shaxsni qasddan o‘ldirish) bandi bilan jinoyat ishi qo‘zg‘atilib, gumon qilinuvchiga nisbatan qamoqqa olish tarzidagi ehtiyot chorasi qo‘llanilgan.
