“Amirsoy Ekspress” ishga tushdi
Toshkent viloyatidagi “Amirsoy” tog‘-chang‘i kurortida yangi “Amirsoy Ekspress” dor yo‘li rasman ishga tushirildi.
Uning ochilish marosimida Bosh vazir o‘rinbosari – turizm va sport vaziri Aziz Abduhakimov ishtirok etdi. Shuningdek, Turizm va sport vazirligi tomonidan mahalliy va xorijiy ommaviy axborot vositalari vakillari uchun press-tur ham tashkil etildi.
Gondola toifasiga kiruvchi mazkur dor yo‘li dunyo miqyosida mashhur ishlab chiqaruvchi - “Doppelmayr” kompaniyasi tomonidan yaratilgan. Zamonaviy dizayn, innovatsion xavfsizlik komponentlari va eng yuqori sifatli po‘lat uskuna dam olish maskaniga tashrif buyuruvchilar uchun qulaylik va xavfsizlikni kafolatlaydi. Salonlarning panoram oynalari yo‘lovchilar oldida o‘ziga xos aylanma ko‘rinish hosil qilib, ularga o‘zlarini tabiat bilan hamnafasdek his qilish imkonini beradi.
“Amirsoy Ekspress” tashrif buyuruvchilarni avtomobil yo‘lidan to‘g‘ridan-to‘g‘ri kurort hududiga yetkazib qo‘yadi, bu esa uzoq masofali tog‘ yo‘lini chetlab o‘tib, haydovchilar uchun 5 kmga qisqartiradi. Uning umumiy uzunligi 2913 metr bo‘lib, soatiga 2400 kishini tashish quvvatiga ega. Sayohat vaqti 9 daqiqani tashkil etadi.
Dor yo‘lining to‘siqsiz dizayni bolalar aravachalari, nogironlar aravachalari yoki sportning qishki turlari bilan shug‘ullanish uchun muqobil qishki sport jihozlarini tashishni osonlashtiradi. Dam olish maskaniga tashrif buyuruvchilar va “Amirsoy Ekspress” yo‘lovchilariga qulaylik yaratish maqsadida bepul avtoturargoh tashkil etilgan.
Avvalroq, maxsus “Call-markazi” ishga tushirilgani va farmasevtika tarmog‘idagi loyihalar ko‘rib chiqilgani haqida xabar berilgandi.
Jamshidbek Amirov
