Ajoyib nokautlar va hayajonli janglar namoyish etishga tayyorman – Shohjahon Ergashev
Sportchi professional boksga qaytmoqda.
Joriy yilning 24-yanvar kuni Shohjahon Ergashev boksdagi faoliyatini yakunlab, o‘zini boshqa sohada sinab ko‘rmoqchi ekanligini aytgandi.
1-fevral kuni Shohjahon bilan sudlashayotgan "Salita" promouterlik kompaniyasi Instagram tarmog‘idagi sahifasida Ergashevning navbatdagi jangiga shama qilingan posterni e’lon qildi. Mazkur posterga bokschi “Endi shoshmay turinglar”, deya sharh berib, uni qayta ulashdi.
Shohjahon Ergashev esa buni quyidagicha izohlagan:
"O‘zimni juda ilhomlangan his qilyapman va ringda ustunlik qilishga tayyorman. Salita Promotions bilan kelishuvimiz ikkala tomon uchun ham foydali va samarali bo‘ldi, faoliyatimni davom ettirishdan mamnunman.
Amerikalik muxlislarimni sog‘indim, yana bir bor ringda kuch va mahoratimni ishga solib, ajoyib nokautlar hamda hayajonli janglar namoyish etishga tayyorman".
Ma’lumot uchun: Shohjahon Ergashev prof boksda jami 21 ta jang o‘tkazgan va ularning barchasida g‘alaba qozongan. 19 ta jangda raqiblarini nokaut evaziga mag‘lubiyatga uchratgan.
