AQSHning Afg‘onistondan fuqarolarini evakuatsiya qilish bo‘yicha aniq rejasi bo‘lmagan — Axios
Qutqaruv operatsiyasi “Tolibon” hokimiyatga kelishidan bir kun avval ishlab chiqilgan.
AQSH hukumati Kobul qulagunga qadar amerikaliklarni evakuatsiya qilishni rejalashtirmagan. Bu haqda Axios xabar berdi.
Faqatgina, 2021-yil 14-avgust kuni Afg‘oniston poytaxti “Tolibon” tomonidan egallanishidan bir kun avval Oq uyda AQSH harbiy tuzilmalari ishtirokida yig‘ilish o‘tkazilgan. Unda, eng avvalo, AQSH diplomatlari va fuqarolarini, shuningdek, Vashington bilan kelishuvga ega ittifoqchi davlatlar fuqarolarini evakuatsiya qilish taklif etilgan.
Shundan keyingina elchixonada ishlaydigan afg‘onlar va NATO va AQSH kuchlari bilan hamkorlik qilgan mahalliy aholi vakillarini qutqarish rejalashtirilgan. Shu bilan birga barcha evakuatsiya qilinishi kerak bo‘lgan odamlarning to‘planish joyi belgilanmagan.
Avvalroq Osiyo taraqqiyot banki Afg‘onistonga 404 million dollar yordam ajratgani haqida xabar qilingandi.
