“U osiyolik raqiblaridan yuqori natija qayd etishiga ishonaman”
Komiljon To‘xtayevning murabbiyi u haqda fikr bildirdi.
Qishki Olimpiya o‘yinlarida ishtirok etadigan hamyurtimiz Komiljon To‘xtayev ertaga ishtirokini boshlaydi. Sportchimiz so‘nggi tayyorgarlik jarayonini italiyalik murabbiyi Mattia Jianessi bilan olib bordi. Jianessi Komiljon To‘xtayevning bo‘lajak starti oldidan quyidagi fikrlarni bildirib o‘tdi.
“Bir necha kun davomida Komiljon bilan Olimpiada startiga tayyorlandik. Haqiqatdan ham, trassa juda murakkab. Avvalgi dasturda bir nechta favoritlarning finishga yetib kela olmaganiga ham guvoh bo‘ldik. Biroq biz oldimizga aniq maqsad qo‘yganmiz va unda eng yaxshi natijamizni ko‘rsatishga harakat qilamiz. Yevropaliklar medalni qo‘lga kiritishda yetakchilik qilishi turgan gap. Biz ularga keskin raqobat tug‘dirishga harakat qilamiz. Komiljondan osiyolik raqiblaridan yuqori natija qayd etishiga ishonaman”.
Eslatib o‘tamiz, ertaga Komiljon To‘xtayev gigant slalom dasturida o‘z chiqishini boshlaydi. Hamyurtimizning dastlabki starti Toshkent vaqti bilan 07:15 da boshlanadigan dasturga to‘g‘ri keladi.
Avvalroq, finlar Olimpiadada birinchi oltin medalni qo‘lga kiritgani va qishki Olimpiya o‘yinlarining saralash bellashuvlari boshlangani haqida xabar berilgandi.
Jamshidbek Amirov
