Afg‘onistondan Tojikistonga narkotiklar kirib kelishi keskin oshdi
Shu munosabat bilan afg‘on-tojik chegarasini kuchaytirish taklif qilingan.
Tojikistonda 2021 yilda Afg‘oniston orqali kirib kelgan 4 tonna giyohvand modda musodara qilingan.
Bu haqda Tojikiston giyohvand moddalar nazorati agentligi direktori Xabibullo Vohidzoda maʼlum qildi.
Uning so‘zlariga ko‘ra, bu ko‘rsatkich 2020 yilga nisbatan 68.45 foizga ko‘p. 2021 yilda Afg‘onistonda jami 320 tonna geroin yetishtirilgani qayd etildi.
Voxidzoda chegarani kuchaytirishni taklif qilgan. Bundan ko‘zlangan maqsad faqat narkotiklar kontrabandasini to‘xtatish emas, balki qurol kirib kelishining ham oldini olish.
Tojikiston yaqin vaqt ichida bu masalani donor davlatlari bilan muhokama qilmoqchi.
Maʼlumot o‘rnida: “Tolibon” harakati hokimiyatni egallagandan keyin Afg‘onistonda giyohvand moddalar yetishtirishni butunlay yo‘q qilishga vaʼda bergan. Ammo ekspertlar bunga ishonchsizlik bilan qaramoqda. Ayrim maʼlumotlarga ko‘ra, toliblar daromadining katta qismi narkotiklar savdosidan keladi. BMT bu 400 million dollar atrofida ekanini maʼlum qilgan.
Eslatib o‘tamiz, avvalroq Afg‘onistonning AQSHdagi elchisi lavozimidan ketgani to‘g‘risida xabar berilgandi.
Jahongir Qo‘ziyev
