Olaf Shols sobiq hamkasbidan Rossiya kompaniyalariga rahbarlik qilishni to‘xtatishni so‘radi
Gerxard Shryoder neft-gaz gigantlari direktorlari kengashi raisi hisoblanadi.
Germaniya kansleri Olaf Shols sobiq kansler Gerxard Shryoderni rus kompaniyalaridagi lavozimlaridan voz kechishga chaqirdi. Bu haqda “TASS” xabar berdi.
"Shryoderga maslahatim — u ushbu lavozimlardan voz kechishi kerak", — degan u.
Bundan avval Germaniya sotsial-demokratik partiyasi xam sobiq kanslerga shunday murojaat bilan chiqqandi. Eʼtiborlisi, Shols ham, Shryoder ham shu partiya aʼzosi.
Maʼlumot o‘rnida: Gerxard Shryoder 1998-2005 yillarda Germaniya hukumatini boshqargan. O‘z vaqtida u Germaniyani Rossiyaning YIdagi asosiy hamkoriga aylantirdi. Shryoder va Putin do‘st sifatida ko‘riladi.
Sobiq kansler 2017-yildan buyon “Rosneft” direktorlar kengashi raisi hisoblanadi. Shuningdek, Nord Stream AG aksionerlar qo‘mitasi va shu kompaniya direktorlar kengashiga raislik qiladi.
Eslatib o‘tamiz, avvalroq Germaniya moliya vaziri Moskva bilan ayrim moliyaviy kanallar saqlanib qolinganini maʼlum qilgandi.
